خوروزوم

خوروزوم

خوروزوم

ای منیم جسمیمه جان دردیمه در مان خوروزوم

کسرم هر بانوا مین قوزو قربان خوروزوم

چوخ زاماندیرهامودان دویموشام ای روح و روان

سن سن عالمده امیدیم اینامیم عشقیم اینان

ورمرم یوز دانا آرواده سنی ای دل و جان

منه آرتیخدی وجودون مین اوغلدان خوروزوم

///

سنون اوستونده منی دانلیری آرواد اوشاقیم

گوروسن منده کوسوب یر سوپورر قاش قاباقیم

دیور آرواد کس اونی قوی یانا دایم اوجاقیم

دیورم نیلور اوجاقی بیله زندان خوروزوم

///

سنین عشقون چکه جکدیر منی بازاره خوروز

باغلیدیر چون اورگیم سن کیمی دلداره خوروز

منده منصور کیمی گر چکولم داره خوروز

قویمارام حقووی دانسین سنون انسان،خوروزوم

///

نه گلوب باشیوه هیچ شهپر آچوب بانلا میسان

هر اویون وار گتوروللر باشیوا آنلامیسا

بو تویوقلار آتیلر پیسریوه دانلا میسان

کاکلین تک اولورام حالی پریشان خوروزوم

///

دیور آرواد ده گوروم شاعر اولوب نیله موسن

گئجه گوندوز دولانوب ،خلقه یالان سویله موسن

یالانی دوز دوزو شعریله یالان ایله موسن

قالمو شام آرواد الینده گوزو گریان خوروزو م

///

بیر دده ساخلاماسا ائوز ائونین عزتینی

ظلم الیندن قوتارانماز بالا جمعیتینی

سعی ایدر گیزلده هرکیمسه دن ائوز نیتینی

هی ورر ملتینه گونده بیر اعلان خوروزوم

///

خوش دگول بیر کیشی آروادیله دائم لج ایشه

ار که کوینک دگول آرواد اونو تز تز دگیشه

چاتمور ال بیر یره مات قلمو شام آخر بو ائیشه

قور خورام هرزادی بیرگون ایده ویران خوروزوم

///

سن عدالت قوشو سان باخما کی دار دیر قفسون

سیخیلوبسان بوجاقا یوخ ایلیین داد رسون

باغلیوبلار سنی زنجیره آچیلمور نفسون

گلی بیر گون اولوسان مشقیمه عنوان خوروزوم

///

بانلاماق وقتی دگول هامیی یاتوبدیر خوروزوم

گونشین فکرینی ائل باشدان آتیبدیر خوروزوم

گئجه نین باشچیسی باشلاری قاتیبدیر خوروزوم

بانلاما تولکو گزیر دوره نی هر آن خوروزوم

///

گونده مین رنگه دوشوب من که جفا ائتمه موشم

الده تسبیحی دوتوب خلقه ریا ائتمه موشم

یاشایش مولکونو ائولکه مده منا ائتمه موشم

نیه منله ساواشیر گونده قیز اوغلان خوروزوم

///

بیر دگر ماندی فلک قوی دولانا دارتا منی

بورویا قرمزی قانیمله بو دشتی دمنی

اولمرم برگون اولی باشینا چالام وطنی

قویمارام چوخ دولانا بر بیله نادان خوروزوم

///

بدنین زینتی باشدیر ائو زوگون زینتی قاش

ائگیدین زینتی قارداشدی گوزون زینتی قاش

جوانین زینتی یولداش اولاسرداش گوزه یاش

یوکه ترماش دئمورم بو سوزی بهتان خوروزوم

///

نقدر دیرکنه ائشکدن آت اولماز خوروزوم

روزگارین ائویونو چوخدو مات اولماز خوروزوم

آجی تپراقدان آخارسیز مالات اولماز خوروزوم

ای دینیم ای ایمانیم ای منه جانان خوروزوم

///

لوح خلقتده سنون تک هانی بیر نقش و نگار

سنی هر کیمسه منیم تک گوره البته تومار

سن ملک سن گوره بولمز سنی هر چشم خمار

آما علم اهلی کیمی اولموسون ارزان خوروزوم

///

خوروزوم ملتی حالدان حلا سالدیم سنه نه

کوهنه مطریب کیمی یوزلر هاوا چالدیم سنه نه

قیزاریب گه بوزاریب گه ده سارالدیم سنه نه

قیرلوب کهنه ماشین تک داها فرمان خوروزوم

///

بولمورم نیله موسن آروادا بوز بوز باخیری

یاندروب قلبیمی باخدیقجا سنه لاپ یاخیری

قورخ او گوندن کی سپه اوستو وه آرواد چاخری

ظلم الیله ایلیه قلبیوی شان شان خورو زوم

///

حیاتین چشمه سی آغلارسا گولر گوللریمیز

داشینار شنلی باغا نغمه لی بول بوللریمیز

اوسه نر یار تلی تک هر یانا سونبوللریمیز

سنده بول بول کیمی اول اوندا غزل خوان خوروزوم

///

حیاتین شاه داماریندا سنه قان ساخلا میشام

کونلو مین لاپ اوجالاریندا مکان ساخلامیشام

گئجه نین شاه ببگینده سنه دان ساخلا میشام

یاندیرا قویویما منی آتش هجران خوروزوم

///

گوزون آیدین گونومیز گون به گون آیدینلاشیری

شکر لله خوروزوم دشمنین عاغلی چاشیری

صبر پیمانه لری دولمادادیر لاپ داشیری

سنده باغلا منیله عهدیله پیمان خوروزوم

///

هوه دیش دئولرین آخر چکجکلر دیشینی

هله سن گورمه میسن الله هین اوغلوم ایشینی

ساخلیا کیمده بو قدرت فلکین گردیشینی

هر کس ائوز ایتدیگینه ورمه ده تاوان خوروزوم

///

سن وکیل اولسون اگر یاخشی یاشار ملتیمیز

قویماسان یوخلویا کیمسه آیلار عزتیمیز

هریانا سایه سالار عدلیمیز امنیتی میز

دوزه سن کاکیلیوه لعل بدخشان خوروزوم

///

گونش اوستن گئجه نین ائورتوگونو آچمالیسان

هله آیدین سحرین آردیجا چوخ قاچمالیسان

او پولاد دیمدگی دئو لر گوزونه ساچمالیسان

گئجه نی ایتملی سن قانینه غلطان خوروزوم

{ثالث}

نظرات شما عزیزان:

تاريخ : چهار شنبه 6 شهريور 1392برچسب:,

| 8:52 | نويسنده : محمود داداش رستمی ثالث |